കൊച്ചി: നടിയെ പീഡിപ്പിച്ച കേസിൽ വിജയ് ബാബുവിന് ഹൈക്കോടതി ഇടക്കാല മുൻകൂർ ജാമ്യം അനുവദിച്ചു. വിദേശത്ത് നിന്ന് തിരിച്ചെത്തുന്ന അടുത്ത ദിവസം വരെ അറസ്റ്റ് ചെയ്യരുതെന്നും കോടതി നിർദേശിച്ചു. വിജയ്ബാബു മടങ്ങിയെത്തുമ്പോൾ അന്വേഷണ ഉദ്യോഗസ്ഥനു മുന്നിൽ ഹാജരാകണം. അന്വേഷണ സംഘത്തിന് ഇയാളെ വിശദമായി ചോദ്യം ചെയ്യാമെന്നും കോടതി പറഞ്ഞു. ജസ്റ്റിസ് ബെച്ചു കുര്യൻ തോമസിന്റെ ബെഞ്ചാണ് വിജയ് ബാബുവിന്റെ മുൻകൂർ ജാമ്യാപേക്ഷ പരിഗണിച്ചത്. വിജയ് ബാബു ബുധനാഴ്ച വീട്ടിലേക്ക് മടങ്ങുമെന്ന് അദ്ദേഹത്തിന്റെ അഭിഭാഷകൻ ഇന്നലെ കോടതിയെ അറിയിച്ചിരുന്നു.

വിജയ് ബാബു തന്നെ പീഡിപ്പിച്ചുവെന്ന് യുവനടി നൽകിയ പരാതിയെ തുടർന്നാണ് പൊലീസ് കേസെടുത്തത്. അന്വേഷണത്തിനിടെ വിജയ് ബാബു ദുബായിലേക്ക് കടന്നു. കേസിന്റെ വിശദാംശങ്ങൾ അറിയാതെ ഏപ്രിൽ 22ന് ഷൂട്ടിങ്ങിനായി ഗോവയിലേക്കും അവിടെ നിന്ന് 24ന് ദുബായിലേക്കും പോയെന്നും ഹർജിയിൽ പറയുന്നു.