തിരുവനന്തപുരം: വൃക്ക മാറ്റിവെക്കൽ ശസ്ത്രക്രിയ വൈകിയതിനെ തുടർന്ന് രോഗി മരിച്ച സംഭവത്തിൽ തിരുവനന്തപുരം മെഡിക്കൽ കോളേജ് അധികൃതർ നൽകിയ പരാതിയിൽ ഇന്ന് പ്രാഥമിക അന്വേഷണം ആരംഭിക്കും. കൂടുതൽ രാസപരിശോധനയ്ക്ക് ശേഷം പോസ്റ്റ്‌മോർട്ടം റിപ്പോർട്ട് ഉടൻ പോലീസിന് കൈമാറും. ഡോക്ടർമാരെ സസ്‌പെൻഡ് ചെയ്തതിൽ പ്രതിഷേധിച്ച് കെജിഎംസിടിഎ ഇന്ന് പ്രതിഷേധ യോഗം നടത്തും. അനുമതിയില്ലാതെ വൃക്കകൾ അടങ്ങിയ പെട്ടി കൊണ്ടുപോയി എന്നാരോപിച്ച് മെഡിക്കൽ കോളജ് അധികൃതർ പൊലീസിൽ പരാതി നൽകിയിട്ടുണ്ട്. വീഡിയോ ദൃശ്യങ്ങൾ പ്രചരിപ്പിച്ച് അപമാനിച്ചതായും പരാതിയിൽ പറയുന്നു. ഗുരുതരാവസ്ഥയിലായ രോഗിയുടെ വൃക്കകൾ കൈകാര്യം ചെയ്യുന്നതിലെ വീഴ്ച ആംബുലൻസ് അസിസ്റ്റന്റ് അരുൺദേവ് നേരത്തെ ചൂണ്ടിക്കാട്ടിയിരുന്നു.

കൊച്ചിയിൽ നിന്ന് വൃക്കയുമായി വന്ന ആംബുലൻസിനെ കുറിച്ച് സുരക്ഷാ ഉദ്യോഗസ്ഥർ പോലും അറിഞ്ഞില്ലെന്നും അതിനാലാണ് വൃക്ക അടങ്ങിയ പെട്ടി കൊണ്ടുപോയതെന്നും അരുൺദേവ് മാധ്യമങ്ങളോട് പറഞ്ഞു. കേസിൽ വിശദമായ അന്വേഷണം നടത്താനാണ് പോലീസിന്റെ തീരുമാനം. ശസ്ത്രക്രിയ നടക്കുന്ന സമയത്ത് സീനിയർ സർജൻമാർ ജോലിയിൽ ഉണ്ടായിരുന്നില്ലെന്ന് ആരോഗ്യവകുപ്പ് നടത്തിയ പ്രാഥമിക അന്വേഷണത്തിൽ കണ്ടെത്തി.

യൂറോളജി, നെഫ്രോളജി മേധാവികൾ പകരം ഡോക്ടർമാരെ നിയമിച്ചില്ല. പ്രാഥമിക അന്വേഷണ റിപ്പോർട്ട് പ്രകാരം വൃക്കയെത്തി രണ്ടര മണിക്കൂറിന് ശേഷമാണ് ശസ്ത്രക്രിയാ വിദഗ്ധരെ വിളിച്ചത്. ഇതിന്റെ അടിസ്ഥാനത്തിലാണ് രണ്ട് വകുപ്പ് മേധാവികളെ സസ്പെൻഡ് ചെയ്തത്. എന്നാൽ, ഡോക്ടർമാർക്ക് പിഴവ് പറ്റിയിട്ടില്ലെന്ന് കെജിഎംസിടിഎ ആവർത്തിച്ചു. സസ്പെൻഷനിൽ പ്രതിഷേധിച്ച് കെജിഎംസിടിഎ ഇന്ന് പ്രതിഷേധ ധർണ നടത്തും.